Trending

KA LA NGHAK RENG CHE

KA LA NGHAK RENG CHE


Bawihte, nangnen a kan inhmuh hnuhnun ber ni kha i la hre ve reng ang tiraw? nilêng in hun kan hmang dun a, tlai a lo nih a kan inṭhen dâwn meuh kha chuan ka mittui ka dang zo ta ngânglo a nih kha, i hmu hman ang tih hlau tak in ka kuahbet tlat che a, nghet takin ka kuah ngawt ngawt mai che a nih kha, hlimtaka kan hun neih chhun te kha hman zawhpui i phu tehreng nen, 'naktuk lo thlengtur hian hlatak ah min ṭhen hrang dâwn a ni' tih hre reng chung a thlahliam che kha harsa ka ti êm a ni, min hrethiam rawh aw.

KA LA THLIR NINGLO CHE A SIN, kuah vawng vawng che kha ka va khamlo em, i kuta chelh a han ti ti dun leh ka va chak em, theihse vawikhat tal, reilote tal i bul ah awm leh thei ila aw.

IN KAL NI A ṬANG KHAN MAW, ka hriatloh kar in  zawi zawi in ka nun hi a danglam hret hret a, keimah in ka tuar ngawt ngawt a,  hlimhmel ka put khat êm a vang in uicho takngial pawh in min hnaih châklo, hlimna an tih te hi ka hne ngawih ngawih a, khawharna leh ruihlo chu ka thian thaber a lo nita a, i chanchin pawh ka hre khât tial tial a, Pathian zarah nunphung pangai ka zawh leh theih meuh chuan i chanchin chhui zui ngaihna reng reng ka hre tawhlo.

TUN AH CHUAN TAR MAI KA LO NI TA, mahse, "a ni zawng a upa tawh emai" ti in he leilung dan te hian min kal kan a tum bik silo, ka thinlung sernung te pawh thlasik a herchhuah meuh chuan a na thar leh vawng vawng thin a nih hi, khang kan hun te kha kum tam in a liam pui ve tawh a, tunah chuan nangmeuh pawh i vul lai a pel ve duai tawh ang a, ka pi ti a koh rual zet i ni ve tawh ngei ang, mahse ka tan chuan engkim mai hi a hunlai ang mai khân a la thar reng a, i mitmeng leh i hmel mawitak te, i pianzia leh i nun ngaihawmtak te kha mitthla ah an cham reng a, khang kan nun zawngte kha, min ṭah nawn tîr tu an la ni reng a, heti em em a ka hnehloh leh min vel nguntu hi ka nun ah hian ka la buan ngailo.

HMÂN A KAN INTHLAHNA HMUN AH KHAN a ngaite bawkin ka va kal leh a, kan nunhlui leh nangmah hriat rengna tur te leh beiseina thar min pe tur engmah thil thar hmuh ka va nei chuanglo, hmân a khawpui daifem, hmun fianrial ni thin kha a danglam zo tawh a, insirial a kan ṭhutna hmun te pawh kha tual châr an chang zo ta, a hmun leh mual mai nilo in keimah ngeipawh hi ka hmelhmang leh lan dan thleng in a danglam zo tawh a, mahse ka beiseina te hi chuan min tar san ve ngailo, khawvel ah hian vawikhat tal inhmuh leh kan tiam kha ka la vawng nung reng a sin.

HE HMUN, HUN HNUHNUNG KAN HMANNA hmun ka tlawh dâwn hi chuan, tleirawl in a ngaihzawng a hmu tur tluk zet in, phur tak in zingkar a tang in  ka in siam a, a Chang chuan ka zam thar leh hial ṭhin, i rawng ngainat em em thin romol ka ak a, mawi i tih ve ngei tûr in ka in thuam a, ka pawisa nawi te chuan i duh em em ṭhin chocolate kha ka lei a, Pangpar i ngainat zia pawh kha ka theihnghilh ngailo, chûngte chu thukru ṭat ṭat chungin kan inthlahna hmun kha ka rawn fang leh a, ka chhia leh ṭha hriatna chuan, i lo awm dâwn chuanglo tih min hrilh mawlh mawlh mahse ka haider lui tlat a, mahse maw Bawihte, tlainitlak dâwn meuh hi chuan haider rual a ni tawhlo, mittui nen Ka haw leh nge nge thin.

ZANAH CHUAN khumah ka let ka let a, sana chek ri leh hun liam ta te ka chhiar a, thil thleng thei leh tinkim ka dawn a, Bawihte, khawilai thlân hmun khawhar ah emaw i taksa chu phûm in a lo awm daih tawh em ni dawn le? i va rawn haw har tawh em, Nge min theihnghilh ta in Khawilai hmunah emaw i damchhungni te i chhiar liam ve mek zawk? a changchuan hmuh leh che ka beiseina hi a tlâwm ve lek lek ṭhin.

BAWIHTE, VAWIIN ZET CHU KA VA HAN NGAI ZUAL TAK CHE EM, en teh thlasik hun kha a lo herchhuak leh tawh a, ka lo la nghak reng che a sin, i chanchin ka hriatlohna pawh a rei ta hle mai, i va kal na hmun ah khan engtiang in nge i awm a, eng thil nge i va tih pawh ka hre zui tawh lo, engtiang pawh in awm la, i awm dân te a vang in ka thinlung hi kehsawm vek dâwn pawh nise la apawilo, rawn haw leh rawh aw, KA LA NGHAK RENG CHE

No comments:

Post a Comment