Trending

The story behind the song that living next door to Alice

The story behind the song that living next door to Alice: 
-Bawiha Bawitlung


Dear Emm-i a han kal meuh chu engtihmah a nuam theilo.Val lungleng hi pindanah ka thu a,ka lunglenna leh khawharna ti zia awm tur in hla lunglenthlak leh lung kuai deuh deuh te chu ka ngaihthla a.Ka suangtuahna leh ngaihtuahna te chu ka thianthaber leh rinngam awmchhun te an ni,ka dai ngailoh ram mah nise ka mut pindan atanga min hruaichhuakin a sam mawitak mai thli in a an chhêm lên velna hmun Guwahati phaiah ngei mai chuan min hruai thin.Ka la kal ngai hauh lohna mah nise a awmna hmun a ni tlat a,a awmna hmun chu ka thinlung awmna hmun tur a ni.Ka mitthlain vai tamtak kar a a nuihmel chu ka zuk hmu thin a,thudang erawh kan sawi ngai chuang hauhlo.

Chutia pindan thim chhung a tluzal chung a Guwahati tual ka han fan kual vel lai tak chuan,ka mutna pindan lehlama zai ri chuan min rawn hruai kir a,chu hla chu
hla dang nilo in hla chuai theilo leh nalh em em mai thiamtak maia Smokie in an sak ‘Living next door to Alice’ ngei mai kha a lo ni.He hla hian chhuan engzah chiah nge a lo awih tlei tawh tih ka chhut hmanlo a,mahse thangthar lo ni tawhte pawh putar an lo nih a,thang lo thar leh te pawhin tingtang kuah chung a an sak duhber mai pakhat leh ngainat ber pawl a la nihfo danah hian hla hlu leh rotling tak zawng a ni chiang a ni!.

Thian ho in kan sa fova,a thunawn lai a ‘living next door to Alice’ tihlaite chauh ka thiam awmchhun anihlai pawhin thiante rualin tuitak in ka su ve hluai hluai thin,mahse tuntum ka ngaithla chu a mi deh dan a dang ta tlat mai.A sa tupa aw a mawi vang leh a hlathluk a mawi danglam vang chauh hian em ni,hla tamtak zingah tun thlenga a la dam?A hlathu ka han bihchiang a,he hlathu phen a awm hmangaihna kil thumnei hahthlak tur zia lo inphum ru te chu ka han hmu a,ka ngaithla a,a hlathu ka han chhiar a dam reng tlak zawng a lo ni ngei e.

Smokie – Living next door to Alice:

Suangtuahna kawm chung a khum a ka tlukzal lai chuan ka phone a rawn ri a,ka han chhawn chuan ka thiannu Sally a lo ni, “Alice-i chungchang kha i lo hriat ve tawh ngei ka ring a…”

Chu veleh rang lutuk tak maiin ka tukverh bulah chuan ka in perh phei nghal a,pawnlam ka han thlir chu;ka mit hmuh ngei pawh nise awih a va han har tehreng em! Alice-i te in kailawn bul maiah chuan,bungraw phur motor lianpui mai hi rem zet hian a lo in hung ruau mai a,Alice-i chuanna tur a ni tih hai rual anilo.
“Aw,Alice-i kher kher chu,engvang a insawn chhuah tum ta nge maw a nih a,khawilam nge maw pan a rilruk tak mai le?” Thil pakhat erawh ka chiang khawp mai,kal tumna leh kalna chhantur feltak a nei ngei ang tih hi,mahse maw a kal dawn tho tho anih si chuanin a kal tumna chhan hi hriat buai vel ka chak kher love,a chhan chu ka han hrilh ang che:

“Alice-i nen hian kum 24 chhung zet chu kan lo inthenawm ve tawh a,chung kum 24 chhung chu,a lak a ka rilru put hmang diktak hrilhna tur a hun tha nghakin ka lo hmang liam tawh,amah nena kan hmalam huntur ka suangtuahna chungchang ringawt pawh hi ziak chhuak thei ta ngat ilang chuan thawnthu ngaihnawmtak tling pha hialtur khawp an ni,mahse tunah zawng a kal bo dawn ta si.Ka hriat zawng chu,hmun hla takah chuan a ni ngei ang le.

“We grew up together
Two kids in the park
We carved our initials deep in the bark,Me and Alice”

Thlai tiak pahnih ang maiin kan thanglian dun a,kan hun tam zawk chu kan in piah mai a thingkung chi hrang hrang awmna huan mawi takah chuan kan hmang dun thin.Thingkungah te chuan lawnin,theirah te chu kan lo a,chung thing hâwngah te chuan kan hming bul intanna hawrawp thumal te chu kan ker kai a,ni e keimah leh Alice-i ngei chuan in!.”

Chona thar hmachhawn turin a inpeih tawh tih hriat tak mai leh inringtawk hmel tak mai hian an in kawngka atang chuan Alice-i chu a rawn pen chhuak ta.Amah min ngaihzual tirtu ni tur leh ka rilru put hmang diktak ka lo hrilhloh avang a ka inchhirna belchhah tu ni turin a mitmeng mawitak mai chuanin min rawn melh a,chuti chuan a tum ram phurthlengtu tur motor ah chuan a chuang kai ta,a chungchang ka lo suangtuahna zawng zawng nen chuan rawn kir leh tawhlo tur ang maiin an tlan zui ta nghal a.

“….Now Alice is gone,but I’m still here
You know I’ve been waiting for twenty-four years….” And a big limousine disappeared…

Rilruna leh chhungril a khawharna nasatak nei chung chuanin,a chuanna motor chu ka thlir zui ta vawng vawng a.Chutih lai tak chuan Sally bawk chuan min rawn 'call' leh a,Alice-i kal liamta chu engtiang taka na in nge ka tawrh tih min zawhpah chuanin he thu hi min hrilh ta a, “Nang tanpui dantur che hi ka hria asin,Alice-i i theihnghilh a hmalam i pan theihdan tur..” A ngawi vang vang a,a rawn sawi chhunzawm leh ta a, “Tunah zet zawng Alice-i a kalta,i rilru a na in hrehawm i ti em em a,mahse i tan hian kei ka la awm a lawm,nang pawhin i hriat kha khang kum 24 chhung khan nang hi ka lo nghak char char tawh che asin…” Chu thu a sawi mek lai chuanin,Alice-i chuanna motor pawh chu ka hmuh phakloh chin thlengin,a herliam zui ve ta nghal a.

“I don’t know why she’s leaving or where she’s gonna go,I guess she’s got her reasons but I just don’t wanna know, ‘Cos for twenty-four years I’ve been living next door to Alice. Twenty-four years just waiting for a chance to tell her how I feel and maybe get a second glance. Now I’ve got to get used to not to living next door to Alice…..”

Heta Alice-i leh a hla phuahtu hi an in tawng leh em? A takah ngei a rilru chhungril diktak hi a hrilh ta em? tih hi ka hre chhunzawm lova, a enga pawh chu lo nise,tlang tamtak in min dang a, Dear Emm in tawn leh ni a awm angem le?? 

No comments:

Post a Comment