Trending

MI DAWTHEI,KA PA

MI DAWTHEI..KA PA..


-Toni Râlte



"Pa, anu hi a lo haw har tawh e" ka tih mêk lai chuan, kan eitur artui a kang sar sar a. Tukverhah chuan ka dak vauh vauh a. Ni e, ka nu chu kar hmasa khan Lunglei lamah kan chhungte tlawhin a zin anih kha.
"Bawihte, chaw hi ei phawt ang. I nu chu naktukah emaw a tuk lehah emaw chuan a lo haw tawh ngei ngei ang" a ti a. Phur deuhin chaw ei chu kan siam sawk sawk a.
Kum 8 ka tling ve tawh a. Kum 6 ka nihin ka nau mipa hi motorin a su a. A boral tawh a. Ka ţap nasa khawp mai. Tichuan kei hi min mal khalh ta a. Ka nu hian fa a nei thei tawh lo nge tih zawng ka hre bik lo. Ka pa hi pa zaidam leh nunnem tak, zawl dawh em em a ni a. Ka nu erawh thinchhe ve tak, an hluk hluk ching a ni thung. Ka nu chu hmelţha ka ti thei hle. Ka pa zia chu a zawi a, fiamthu erawh a thawh ve fô thin. An inhau ve fô a. Mahse, ka pa hian vawikhat mah kut a thlak ka la hre lo. Ka nu chu hna nei a ni a, ka pa erawh inlamah ran te vulhin inchhung enkawl hna a thawk thin.

 A eisiam chu tui ka ti thei hle. Nitin schoolah min hruai ziah a, tlaiah min lo lam leh thin. Ka nuin ka duh lo chung room hranah min mut tir a, ka hlau thei hle. Ka hlauh zual chang chuan ka pa ka ko a, min mutpui a, min pawm hlu hlu thin. Ka hmuh tam loh zawk vang nge ka nu hi ka ngaina lo zawk niin ka hria. Mahse, mi zingah ka chhuang thei hle, inchei a thiam si. Inkhawm dawna min chei te hian nuam ka tiin hmeltha ta riau hian ka inhre thin. Mahse, chutiang chu a thleng zen zen lo, ka pa min chei a tam zawk thin. School ka kal dawn pawhin min siama, ka sam min phiar sak thintu chu ka pa a ni. Kan in chu a lian hran lo a, kan pathum chenna atan chuan a tawk viau tho mai. Rethei bakberhin kan awm lo bawk a. Ka hringnun chu a nuam ti mai teh ang.


Mahse, ka nu zin hma ni 2 vel atang khan kan inchhung boruak chu a nuam lo in a rit ru em em a. An inhnial dawn deuh chuan ka pain ka roomah min hruai a, chhuak lo turin min ti thin. An thusawi engmah ka hre ngai lo. Tichuan, ka nu chu a zin ta a. Min hruai ve lo chu ka vui ru viau mai. Mahse, ka pain, "School chawlhah kan zin dawn alawm" a tih avangin ka thla a muang leh ta deuh. Ka nu awm lo chu kan pafa chuan hrehawm kan ti em em paw'n ka hre lo. Mahse, a rei tak deuh avangin ka ngai ve deuh a. Ka zawt ta reng kha a nia.
.
Schoolah thiante nen kan infiam a, kan tlan a. Kan nui hawk hawk a. Lehkha hi ka thiam em em lo naa, lemziakah chuan ka sang fal nalh thung. School ban dar a lo ri tleng tleng a. Mahse, ka pa hmel ka hmu lo! Gate bula tlaitin lo dinga min lo nuih sâng thintu hmel hmuh tum chuan ka hawi ruai ruai a. Ka hawihai hmel chu kan miss zinga fel leh ka ngainat ber Miss Jenny chuan a lo hmu vat a.
.
"Kuri, i pa a lo la kal lo ani maw? A pawi lo e. Tirawh ka thlah ang che . i pa chu a buai deuh aniang" a ti a. Ka lawm rualin ka zak deuh bawk si. A scooty hnungah chuan ka thu ta vang a.
.
Kan in kan thleng a, makti takin ka ding ta reng a. Ka inchhung bungrua chu an lo thiar chhuak deuh vek a. Ka pa chu kil khatah ngawi rengin a lo ding a. Min hmuh veleh nui lui tih hriat tak hian, "Bawihte, vawiin chu ka rawn hruai hman ngang lo che a ni. In miss kha ka rawn hrilh ta mai anih kha.." A ti a. A mitmengah chuan tawrhna thuk tak hmuin ka inhria. Ka la naupang êm a. Ka ngaihbel pawh ani mahna.


"Apa, ti nge kan bungrua hi?" Ka ti a.
.
"Nia hei i nu ten an rawn la a nih hi. Bawihte, tun atang chuan kan pahnih chauhin kan awm tawh dawn a ni. I nu chu an inlamah a awm hrih dawn a" a aw a thian a.
.
"Ti nge anu chu awmhran kher a tum a" aw...zawhna te kha lo zawh malêk loh tur hi a nia.
.
"Bawihte, i nu chuan min chhuahsan ta a ni" a ti sap a. Ka nu leh pate chu an inţhen tih ka hrethiam. A chhan erawh ka hre hauh lo. Ka bo takzet a ni.
.
Ka nu chu ka hmu a. Ka pan lai chuan pa sang deuh, ngo deuh mai hian a lo kuah a. Chu pa chu ka pa a ni lo tih ka chiang ve em em ringawt. "Anu" ka ti a. Ka aw chu a ri chhuak tha hleithei lo. A lo hawi a. "Kuri, ka bula awm i duh em? Ka bulah awm rawh aw" satliah zet hian a ti a. Ka lo ner sawk.
.
"Ka duh lo" tih leh ka pa bula tlan ka rual a. Ni e, ka nu mahnise ka pa a tel ve dawn loh chuan a bula awm ka duh teuh lo mai.
.
Kan pafa chuan kan in ruak zetah chuan kan khawsa ve rak rak a. Kan awmna in pawh chu ka pi (ka nu nu) te in anih avangin insawn a ngai a, mi inhnuai chep zetah kan inthiar chhuak a. Ka nu khan bungraw tih tham min hnutchhiah loh avangin kan inhnawh leng ve thei tho mai. Ka pa chuan a ranvulh te a tiral a. Nitin inhlawhna tur zawngin a chhuak ve ta a. A hma te kha chuan ka nu hlawh ringin kan khawsa thei a, inlam a lo enkawl bakah a ranvulh te kha sum siamna tho a ni thin a. Tunah erawh nitin eichawp dap a ngaih tawh avangin ina lo awm mai kha a theih tawh si loh a. 

Pumpui na nei a ni lehnghal a. Hna rim thawk thei a ni si lo. Ka nu hlawh atangin kei min chawmna tur chu a cut theih reng, mahse, ka pa thusawi ka hriatreng chu, "Kan pafa in min duh tawh lo a, min uiresan a, chutih a hnu ka fanu hi a fa a ni ve tawh lo. Nakinah ka fanu hi ka chawm ka hrai tia min rawn chuhpui leh takin heng a sum thawh chhuah hmanga ka fanu a chawm hi ka phal lo bur. Ka dama ka la thawk ve ţêk ţêk chhung chuan ka fanu hi rilţamin a thi lo ang" a ti a ni. Ka nu chuan min lo uiresan tih ka hre ve chiah. 

Lungleia a zin emaw ka tih kha a tlan a lo nia, ka pa khan vawi thum lai a uire lai a lo phâwk ani awm e. Keimah vangin a ngaidam zel a. A tawpna erawh a thei ta thlawt lo a. A hnawtchhuak ta a ni. Uirenu a ni tih inhre lo ang hmiahin a bungrua a rawn lak te khan ka pa kha a lo ankhum hlawih hlawi a. Ka nu kha ka nu ni lose ka va duh êm...ka pa dawhtheih zia kha aw..

Ka school kalna pawh kan thlak a. Man tlawm zawka luh pawh pawi ka tih loh nen, ka pa duh dan a ni ve lo. School thaa an sawi hat hatah harsa chung chungin min luh tir a. Retheihna awmzia hre tura retheih hmasak phawt a ngai hi kan pafa khan kan va tuar nasa zual bik êm..
Zanah kan pafa in khum khatah kan mu bal a, thawnthu min hrilh in min awimu a.
Nikhat chu a hnathawhna te fanu keimah ang rual nen kan inhnial a. "Nu pawh i nei tawh lo, i pa pawh kan inah a inhlawhfa thin. Chuan apa in a ban daih tawh..mutthluk a hrat si" a ti ta. Ka khur der der mai. In ka thlen chuan ka pa a lo la haw lo a. Ka thiam ang angin chaw ka lo chhum ve a. A lo thlen veleh, "Pa, ngati nge.." Ka ti dawn chauh a, a hmel ka en khan ka sawi ngam tlat lo. Zantin ka mutthilh hma zawng a meng a, zanlaiah ka zun chhuak se thawh phan pawh nei loin a tho vat a. Min zun pui a. Zing hma takah thoin ka eitur siamin a buai leh nghal a, tichuan a hnathawhna hmunah a mut a chhuak a, a lo mutthluk avangin a ruaitupa chuan a ban ta a nih chu! Keimah vang maw..
Ka kum rualpui te aiin ka te bik a, ka hriselna a that vak loh bakah ei ka hmu ţha lutuk lo bawk nen. Thiante chuan "Tetakteii" min ti thin. Huat enah pawh ka en lo. "Pa, ti nge ka tet bik? Ka ţhang thei lo aniang" ka tih ţum chuan, "Bawihte, i hmeltha ber, i mawiin i duhawm ber alawm. Nakinah i la len khalh vek dawn nia" a ti a. Ka pa thusawi anih avangin ka awih hmiah bawk. Mahse, chumi tlai ka school bang chu bazar lun lai taka ka pa in bungraw rih hmel zet zet a phur pur pur ka hmu a. Min hmu ve lo a. Ka en thla ta reng a. Pawisa a neih hnu chuan, clinic pakhatah lutin sarangin damdawi engemawzah a rawn khai chhuak a.
Zanah chuan chung damdawi te chu min ei tir a. "Ka thian Doctor pakhatin ka laka lawmthu sawi nan min pe anih hi..ei ziah la, i chaw ei a tui sawt sawt mai ang" a ti a. Ka thinlung chuan dawt a sawi tih ka hria. Mahse, engmah ka sawi ngam lo.
A tuk tlaiah chuan tui ka lo lum sak ve a. A lawm hle mai. Mahse, a ruka a kut durh vel a dep chu ka hmu reng a. Chaw kan ei laiin, "Pa, i kut hi tuam i la" ka ti a. A nui hawk hawk a, "Ka kut hi a la chak asin, eng pawh a zo vek. Chutia na mai mai chi a ni hleinem" tih pahin a intisek kual a. Za lo zetin ka lo nuihpui thung. A kut durh leh pilh vanga chaw sa a bar that ngam loh zia hmu tu ka ni si a.
Nikhat chu min rawn hruai leh a. Min lo pawm vat a. A ipte atang chuan bawm lian lutuk lo hi a rawn phawrh a. Ka'n hawn nak chuan cake tui hmel em em tuihnai zet hi a lo awm a. "Happy Birthday..Kuri" tih a lo inziak bawk a. Ka lawm lutuk chu ka zuang zawk zawk a. Kut te ka beng a. Ka va hlim tak. Kan pahnih in cake chu kan ei ta a. Tui ka va ti tehlul em..mahse, zanah ka muhil emaw an tih laiin kan inchungnu nen an inbia a.
"Min lo hrethiam hram rawh u. A piancham ani sia, ka neih chhun a ni a, a tha thei ang ber tihsak ka duh ve sia. Inluah man atana ka dah ka hmang a, ni 3 hnu velah chuan ka pe thei em em ang che u" ka pa chuan a ti a. Ka nghing lawih hian ka hria. Kan inluah man aiah ka birthday cake a lei anih chu. Tlaiah kha chuan, "I duh duh ka lei ang che. Pawisa chu ka ngah alawm" tiin a rawn phawrh nual anih kha. Khangte pawh kha inluah man vek a lo nih chu!

Kan pafa harsatna chu a ni telin a zual zel a. Ka pa lahin inhlawhna tur a hmu reng thei bik si lo. Vawi tam tak a bianga mittui luang chunga a ţawngţai lai ka hmu tawh. Len vat vata ka pa chhawk theih hi ka duhthusam a ni.
An insak atangin a tla a, a kawng a sawh a. An rawn zawn lut a. Ka mangan zia leh ka thlabar zia kha. Damdawiinah kan kal pui a. Na ti chung chungin min nuih lui hram hram a. "Bawihte, ka tha ania. Min ngaihtuah suh aw. Ka dam leh vat dawn alawm" a ti sep sep a. Kan pafa damdawiin awm ve chuan tui bottle pakhat leh thleng leh fiante chiah kan nei ve. Ka pa hi vanlaia tla a ni a, a ni enkawl seilen ani. A ni lah a boral tawh bawk. Chutiang anih avang chuan ania keipawh hi fahraha ka awm a hlauh em em a, ka nu uire pawh a ngaihdam thin ni.
Ka manganna chuan a vawrtawp a thleng takmeuh a ni. Zah pawh dawn loin ka nu te inlamah ka tlan a. Ţap chungin pawisa ka va dil ta a nih chu! Ka pi chuan cheng 1000 min pe a. Ka nu chuan engmah!
Damdawiin ka va thlen leh chuan thilmak ka hmu ta a ni. Pathian hi a lo awm chiang tih ka hria. Ka pa chu samari mitha te thawhkhawm sum thahnem tak an lo hlan a! A zat tak pawh ka hre lo. Ka pa bianga mittui luang kha lawmna mittui a ni tih ka chiang. Mi te hi an va ţha tak em..tichuan ka pi pawisa min pek pawh chu va pek let leh ai chuan tiin kan khum bula naupang kei aia nau deuh hlek, a ban kang vanga enkawl.mek chu ka hlan ve ta tawp a. Ka thaw huai mai.
Rei tak chhung ka pa a bawk sawp a. Mahse, Pathianin a tidam a. Mite tanpuina azarah pangngai takin a awm leh thei ta. Lawmna dangin min rawn pan leh a. Chu chu nu thar ka nei ta kha a ni. Ka nu thar chu ka pa thianpa nau a ni a, min duatin min ngaihsak hle. Ka nu aia ka nu a nih lohna chu thisenah a ni mai awm e.
Hmana ka pa thu min hrilh thin kha a thleng ta tih la hria. "Bawihte, chunga Pathianin bawkkhupin min thlir reng a nia. Zângkhua a la bungbu dawn alawm. Engtikah emaw chuan Pathian hian kan duhthusam a rawn thlen tir em em ang" tiin.
Ka pa chuan dáwt min hrilh thin. Mahse, MIN HMANGAIH VANG A NI SI A! KA PA, KA HMANGAIH CHE.
(True Story a ni lo ania)😊

No comments:

Post a Comment