Trending

DALTONI CHAPTER 2

DALTONI CHAPTER 2

Diphu chu zing dar 5 ah kan thleng a, khawfing a chat fel deuh chauh ala ni. Chutah chuan Rel chu darkar khat a ding ang a, chumi hnuah chuan Gauhati lampanin a chhuak leh dawn a ni. Daltoni chu ticket pawh nei lo, chuang ve tawp mai a ni a. Min rawn check se chuan kan pahnihin kan tal buai dun ngei ang. Mahse min rawn check lo hlauh va. Gauhati a kalna tur chu ka buaipui a, ticket te ka lak sak a, vanneih thlak takin second class kan chang hlauhva.

Diphu atang chuan a u chu a phone a, a nu leh pate chu amah ngaihtuah lo tura lo han hrilh tur leh a awmna chin erawh chu hrilh lo turin a ti a, an thu an sut hma chuan a nu leh pa hnena hawn chu a tumloh thute leh Diphu atanga dar 6 ah Gauhati-a a hnen lampana a chhuah tur thute chu a hrilh a.

“Sigfret, pawisa pakhat mah ka nei si lova, min hman hawh tir tur i nei thei angem? Ka ticket man te nen khan ka u hnen ka thlen veleh ka rawn thawn mai dawn che nia,” a ti a. Kei chuan, “Ticket man kha chu rulh leh a ngai lovang, ka tum che ni rawh se. Engzatnge i puk ang?” ka ti a. A ngawi vang vang a, “Ih...Gauhati ah min hruai la, i let chho leh mai ang a...” ti chungin, inthlahrung tak hmel si, a hnena kal tura min duh siin nui ti tih hian min en a. “I kiangah hian ka thla a muang,” a ti zui a.

Platform ah chuan thingpui leh chhangkan vel an zuar a. Chungte chu kan ei dun a. Ka rilru chu a buai ang reng khawp mai. Amaha han kal tir chu ka ngai ngam meuh si lova, mahse hnamdang an ni a, nu leh pa lak atanga tlanbo a ni a, nakinah rinloh deuh deuh te hi ka chungah a thleng palh mai angem? Kalpui ta ila, Gauhati kan thlen meuh chuan eng vakah min ngai zui pawhin ka ring lova, ka intihrehawm mai mai a ni angem ti tein ka ngaih tuah a.

“Gauhati hi i vawikhat kalna tur a ni lo va, kei aiin i hrechiang vel vek zawk a. Chuvangin, ka ni pasal a dam lova, min rawn chah a ni a, ka thlen vat a tul si a. Ka hruai lo mai ang che Daltoni. I thlen veleh chanchin erawh min rawn hrilh ve dawn nia,” ka ti a. Rel kawng inphah zui lam chu a thlir vang vang a, a lu a bu nghat nghat a.

Rel chu kal turin a inbuatsaih a, a che tan ta a. “A nih leh Sigfret, ka kal mai ange. Ka thlamuanpui che leh ka rilrua i awm ang hian i rilru ah chuan ka awm ve si lova,” a ti a. A tho va, tichuan, a chuanna tur pindanah kawngka ah chuan a lut a. Dah pawh a rawn dak zui lova, rel chu zawi muangin a kal zel a, ka thlir reng a, a liam ta a. Ka khua chu a har ta hle mai a.

“Ka thlamuanpui che leh ka rilrua i awm ang hian i rilru ah chuan ka awm ve si lova.”

A thusawi chu ka bengah a rawn ri nawn leh a. “Tak tak em niang aw?” tiin ka ngaihtuah a.

Tleirawl chhuah tirh ah ngaihzawng la nei a, mahse chuti vakin ka vei zui lo. Unau ah a naupang ber ka ni a, kan inchhung chu nuam ka ti a, ka nu leh pa leh ka u te kiangah chuan ka hlim a, tumah dang ka ngai vaklo. College te kan han kal a, min duh ve deuhtute chu ka nei ve nual a, mahse ka rilru ah an awm lem lo. Daltoni kal ta chuan ka khua a ti har a, mal ta riauvin ka inhria a. Zawi muangin ka inher a, ka bag ka ak a,Diphu khaw chhung lampan tur chuan zawi muangin ka pen tan ta a.

“Engahnge ka lo hruai mai loh?” tiin ka inchhir a. A hmel ngui riai chu ka mitthla ah a lo lang a, ka khawngaih a, mah se a sawt tawh si lo. “Aw...Daltoni...” tiin ka hriat tawk lekin a hming chu ka lam a. Chutih lai tak chuan, “Sigfret,Sigfret,”tia kohna ri ka hria a. Midang inkori em ni ang tiin ka ngaihtuah a. Mahse Daltoni aw ngei chu a ni si a.

Hnunglam ka hawi a, Rel kawng ah chuan ka lam panin a rawn kal a,Daltoni ngei a ni. Mak ka ti a, ka lawm bawk si a. A lam panin ka tlan a, a bul ka thlen chuan min pawm chawt a, keipawh chuan ka lo kuah ve nghal a.

“Engatinge Daltoni.”

“Ka kal thei lo. I kianga awm rih ka duh.”

“Daltoni.”

Miin maktiin min en a ni tih ka hrechhuak thuai a. Kan in thlah a, kan in en a, hlim em emin kan in nuih a. A hlim hmel chu a mawiin a nalh a, en a nuam a, ka mit kaltlangin ka thinlungah.....min fan chhuak a. Ka nite awmna Amlapatty veng lam pan chuan kein kan kal dun ta a.

Ka ni pasal ka pa Thuama chu Civil Hospital ah a awm tih ka hria a. Chuvangin, an in thlen hmain damdawiina tlawh nghal thain ka hria a. Ka kal hmasaka thirsakawr chuan thiam tha thum lova Assamese nu pakhat ka sut thlukna hmun kan thlen chuan ka sut dan te chu Daltoni chu ka hrilh a, a nuih a za hle a. Damdawiin ah chuan kan lut a. Ka ni fanu ka u Lawmi chu bathlarah a lo awm a, min hmu chu a lawm hle mai a. Daltoni a hmuh chuan mak a ti tih ka hria a. Thil awmzia ka hrilh mai duh rih lo va, ka nupuiah a ngai deuh a ni tih ka hria a, a meng buai vel tak chu hmuh nuam ka ti tlat a ni.

Ka pa Thuama chu ka rin ai takin a lo chau va, a pumpui ulcer leh a thin thalo niin an sawi a. Palian tawk leh thau lam, dul kiar ve lek lek thin kha a ni a, a lo cher ta hle mai a. Ka nite hian fanu hlir pali an nei a, pahnihin pasal an nei tawh a, pahnih ka u Lawmi leh an naupangber Kimtei, kei aia kum khata naupang chu an la kawl a. Mipa nei ve ta lo chuan min ngai a, an hnena zin tur hian min chah fo va, keipawhin nuam ka ti a, vawi hnih chu ka zuk zin tawh a, a bik takin ka pa Thuama hian min ngai zual thin a ni.

Darkar chanve vel kan awm a. Tichuan, inlam panin kan kal ta a. In kan thlen chuan ka ni chuan ei rawng a lo bawl a, Kimtei chuan hmun a lo phiat a. Min hmu chu an lawm hle a, Daltoni an hmuh chuan a ngaihna an hrelo deuhva. Daltoni nen kan intawn dante chu ka hrilh a.

Daltoni chuan a u hnenah chanchin a zuk hrilh a. Chutianga hmelhriat tha sa pawh ni lo, keini hnamdang bula a awm tur chu a ngaihdan a ni chiahlo na a, a tawpah chuan a hmin thei ta tho a. A u hnenah chuan engtiang chiahinnge a sawi tih chu ka hre lo, kimchangin a sawi si lo va.

Ka ni Lalkungi te hian dawr an nei a, ka pa Thuama hi Assam police a ni a, nikum kum tawp lam khan a pension a. Eichawp dawr an nei a, chu chu ka nite nupa chuan an nghak thin a, Kimtei’n a hman changin a nghah pui bawk thin. U Lawmi chuan Karbianglong District Council office ah LDC hna a thawk a. Ka pa Thuama hian ramkal a chak thin a,ka zuk zin chuan tlangramah riakin kan ram chhuak thin.

Tlaiah ka ni nen ka pa Thuama chu kan tlawh a, zanah riahpui turin min phut deuh tlat a. Kan hawn chuan kan han sawi a, Daltoni chuan riah ve a duh thu a sawi a, mahse pakhat aia tamin riahpui an phal ngailoh thu an sawi a. Daltoni chuan ka ni hnenah chuan, “Aunty, ka kal ve phawt ang a, riah theih dan ka dap ang a, ka hlawhchham leh ka lo haw leh mai ang. I remti em?” a ti a. Ka ni pawh chuan, “Han tum chhin la,” a ti ve mai a.

Chawei khamah damdawiinah chuan kan kal ta a. Daltoni chuan chumi ward a duty nurse chu a va bia a, eng eng nge a sawi chu ka hre lo. An pahnih chuan an titi dun a, an nui an nui a. Nakinah chuan a lo phei a, “Sigfret,ka riak ve thei dawn asin...ka va kawm leh lawk ange aw,” a ti a. A pan phei leh ta a.

Ka pa Thuama chuan, “ Hei, a fel awm hi mawle. A hmel lah chu a tha hle mai a, a nungchang lah a duhawm hmel bawk si a. Tiang taka nula hmeltha hi ka la hmu lo ka ti. I nupui atan pawh a tha ang,” a ti a. Ka pa Thuama hian chutiang lam chu ka bulah ala sawi ngai lo reng reng a, mak ka ti deuhva.

“Ka pa Thuam, zu i in leh a ni lo maw?” tiin ka zawt tawp a. A nui suk a, a aw a thian a, “Pensioner ho kan inhmu khawm a, chaw te kan ei ho va. Thianten an dawm vek si a, duh ve ngawih ngawih thin ka ni bawk a, ka insum zo ta lo alawm mawle. Rui hnapin ka in ta law law a, zanah pawh ka thiante inah ka riak a. Chumi tuk atang chuan ka dik ta lo a ni. I niin min dawp a, mahse ka inlo ka ti tlat a. Tun hnuah zawng ka ti leh tawh lo vang. Taka,eng chen nge i cham theih ang?” a ti a.

Kei chuan, “Ka sawi thei rih lo.Han dam phawt la,ka hun awl neih remchan lai chu a ni a,” ka ti a. Ani chuan, “Ka dam ang, tunah pawh na ka nei tawh hlei nem, zu ka intukah khan thiin ka luak a, chuvang chu a ni ang ka chau ngawih ngawih mai a. Tunah chuan ka dam a ni tawh mai. Cham ve reng la, kan ram chhuak leh dawn nia,” a ti a.

Ka pa Thuama mutna kiangah chuan thutthlengsei a awm a, chutah chuan Daltoni nen chuan kan thu a.Ka pa Thuama chu tui takin a muhil a, Daltoni nen chuan kan titi dun a, chanchin min zawt a, kan chhungkaw chanchinte chu a tlangpuiin ka hrilh a. Ngaihnawm ti takin a ngai thla a, khawdang hawi mang lovin min en a, keia chanchin te chutianga ngaihnawm ti em ema a ngaithla peih leh a hre chak chu mak ka ti hle a.

“Daltoni, i u khan hetia ka kianga awm hi a remti vaklo khan ka hre deuh va, ka rilru a nuam vaklo. Engtinnge kan tih ang?” ka ti a. Daltoni u hming hi Neorem Deben Singh a ni.

Ani chuan, “Nia, a hma atanga ka hriat sa pawh in ni si lova, in kianga ka awm tur chu min ngaihtuahlo thei lo alawm. Nangmahah han inchan la, i farnu te awmdan turah ngai la, ka u chu a thiamawm i ti ve tho vang. Mahse, i rintlakzia ka sawi a, ka dinhmun chu min hrethiamin min pawm tak kha. Rilru tinuamlo duh suh,” a ti a.

Kei chuan, “ A nih engtia rei nge awm i tum ang?” ka ti leh a. A ngawi vang vang a. “Sigfret, min ning em ni?” tiin min zawt ta a. A mitmengah chuan inthlahrunna a lo lang a. Kei chuan, “Ning lo ve. Mahse, i lakah hnamdang daih ka ni a, i tan heta awm hi a nuam vakin ka ring lo va. Chu bakah i nu leh pa in an ngaihtuah hle dawn che si a,” ka ti a.

“A nih naktukah ka u hnenah chuan ka kal mai dawn em niang? Nangman tha zawka i hriat chuan pawi ka ti lo. I kianga awm hi ka chak em a, kan hnam dan angah ka awmdan hi a mawi lo va, thil tihchi pawh a ni lo. In hnam danah pawh a mawi chuangin ka ring lo va,keima chak zawng ringawt anga ka awm chu a dik lo mai thei a ni,” a ti a. Sawi leh tur ka haihchham a. Ka lu thaklo pui te chu ka hiat vel ta mai mai a.

Tawngri hian min ti harh a, khum bawhin ka lo muhil a. Ka pa Thuama leh Daltoni chu Hindi in an lo titi a, Daltoni chuan ama chanchinte a lo hrilh mek a. Ka harh na a, ka che mai lova, ka harh a ni tih an hre lo bawk a. Muhil ang chuan ka awm zui a.

“Tichuan Rel ah chuan ka lut ve tawp a, mipa hlir an lo awm a, a tirah chuan ka hlau deuh va, mahse misual hmel pu an awm lova, pakhat tih chauhlo chu sipai vek an ni lehnghal a. A hnuah midang zawng chu an chhuk ta a, Mawia chiah hi a awm ta a. A mak lutuk, a hmel ka hmuh phat atang hian maw Pa Thuam, ka ngaina a, kan pahniha kan awm hnu chuan ka thla hi a muang ta em em mai a. Diphu atanga Rel ah ka han chuang a, Gauhati lampana ka kal chu ka lung a leng lutuk a, Mawia bula awm ka thlalhlel a, zah pawh dawn lovin Rel tlan chak hmain ka chhuk a, ti hian ka awm ve leh tawp mai a ni,” Daltoni chuan a ti a. Ka tukhumah chuan dimte hian a rawn chul a. Ka hit deuh chiaih chiaih hian ka hria a.

Pa Thuama chuan, “ Mawia hi chu a ngainat awm a, a rilru te hi a tha a, keipawn ka ngaina. Ka fate ai mah hian ka ngai emawni chu te ka ti thin. Chutianga i nu leh pa i tlanbo san tho tho va, lehkha zir emaw tihtur hmabak hmanhmawh thlak te i neih lem loh chuan awm ve rih rawh. Mawia pawn a ngaina riau chein ka hria a ni,” a ti a.

Daltoni chuan, “Ngaina pawn ka hre lo, ka u hnena kal turin min ti deuhva, naktuk tuk lehah hian ka kal mai dawn emawni ka ti a ni,” a ti a, a thusawi tawp lam chu a zuih ral lek lek a. Chutih lai tak chuan muhil harh hlawl angin ka awm ta a. An pahnih chuan min en a, “In muhil nange,” ka ti ringawt a. Sana ka en a, zinglam dar 3:45 a lo ri tawh a.

continued....

No comments:

Post a Comment