Trending

DALTONI CHAPTER 1

DALTONI CHAPTER 1

A ni,thla leh kum chu ka sawilo mai ang e. Khua a vawt hle a, a vawh dan chu sawifiah ngaihna pawh ka hre lo. Ka khua a sik ta em ni ka ti hial a, tiang hian Silchar a vawt ve ngai ang tih reng ka lo hre ngai lo. Silchar rel station ah chuan ka chuanna tur rel zan dar 8 a lo thleng tur chu nghakin, ka thuamhnaw tlemte nen chuan ka thu ngawi reng a. Ka kiangah chuan vai pali hi an thu ve a, eng hi nge maw an sawi zawh zai ni ka ti mai mai a, an tawng char char a. An inthuamna silhfen tial nen, an tawngri nen.....nen...ka ning hman kher mai.

Rel a lo thleng a, keini ang chuan vena compartment ah chuan thuamhnaw an thehlut a, tichuan tharum takmeuh nen an inhnawh lut a, ka lawn ve dawn a, kawngka sira vawn ban chu ka vuan ve hman a, mahse min nek tla leh a. Rel lah chu a kal tan leh a ni tawh mai si. A hnung lamah chuan theihna a awm takin ka ti a, ding chungin ka lo chang a, chutah sipai uniform ha palian zet hian ka banah a rawn vuan a, hneh zetin min kai lut ta a. Chu pindanah chuan sipai pali hi an lo awm a, kei,civil lubawk satliah chuanna tur chi a ni lo tih ka hre nghal thuai na a, pindan danga insawn ngaihna a awm tawh si lo. Train Examiner (Conductor) lo kal hunah engtinnge ka tih ang tiin ka ngaihtuah nghal a. Chutih lai tak chuan min kailut tu kha a lokal a, “ Lungngai suh, thlamuang deuhvin thu la, kan pindanah hian i chuang ve zel dawn nia. I hmelah Mizo i niin ka hria a, chuvang chuan ka rawn kai lut tawp mai che a nih kha,” min rawn ti a. A hmel ka han en chian chuan Mizo tlangval lian thelh thawlh leh hmel chhelo tak hi a lo ni a. Ka thla a muangin ka lawm hle a ni.

Ka muhil chu ka harh hlawl mai a, pawnlam chu a lo thim mup tawh mai a. Engtia rei nge ka mutthilh ka hre lo. Rel chhung eng chau zet ah chuan ka sana ka han en a, zanlai dar 12 leh minute 37 a lo ni tawh a. Ka chuanpuite pawh pakhat tih chauhloh chu an lo muhil vek a. Ka mutna atangin ka chhuk a, tukverh bulah chuan ka thu a, pawn khaw thim lam chu ka thlir vang vang a. Rel tlan chu a zawi tual tual a, a ding ta a. Mail hi chu a ding chauhva, a tlan leh nghal deuh mai zel a. Minute hnih vel lekah a che a, a tlan leh ta nghal a. Chutih lai tak chuan hmeichhe pakhat,Sari kaih hi kan pindan kawngka ah chuan a rawn lut a, kal velna sirah chuan a thu a, hlauthawng hmel zet hian min en a.

Ka chuanpuite ho pawh an rawn harh hlawm a. Min lo kai lut ta khan chu nula chu Hindi in a bia a, chu nula chuan a chhang lo. A mitmengah chuan thinrimna leh thlaphanna a lang a ni. Midang chuan an tawng hriat ang angin an han be hlawm a, mahse tumah a chhang lo. A lampana han che deuh an awm chuan mahni inveng tak chung hian a intuam khawr a, a mitmeng chu keite thinrim ang mai hian a sen ram mai a. Sari a kaih na a, vai hmel chu a pu si lo.

Khawilai nge kan thlen tawh ka hre lo va, Rel chu a ding a, chutah chuan ka chuanpuite chu an chhuk ta dial a, reilote ah Rel a kal zui leh nghal a. Hmeichhia, nula ni ngeia ka rin chu chhuatah a thut a, a khup chungah a khabe nghatin a kut pahnih chu a ke hmalamah a suih a. Thuamhnaw dang ken engmah a nei bawk si lova, engtizia chu ni ang maw tiin ka ngaihtuah a. Chhuat chu a en a, a ngawi reng a.

Mizo tawngin ka bia a, min chhang lova, hre awm pawhin a lang lo. Saptawngin ka be leh a, min la chhang chuang lo. A hmelah hlauh a nei tih a hriat a, chuvang chuan a awm awma awmtir mai chu thain ka hria a, nakin deuhvah ala biak theih mai ang tiin tukverh lam ka hawi san ta a. Darkar chanve velah chuan ka han en leh a, a lo muthlu lap lap a. Rel han insawi velah chuan a sir lamah a tlu lek lek thin a.


“Nula, hlau mah ta che, engtinmah ka ti dawn lo che. Thutthlengah hian rawn thu ve rawh. Tumah dang pawh an awm loh hi,” tiin saptawngin thutthlenga thu turin ka ti a. Chutah chuan a rawn tho va, ka hma lama thutna awmah chuan a rawn thu ta a. Biak zui zel ka duh nain amah chuan a duh loh hmel emin ka hria a, ka be zui ta lo.
Mut chhuahna chuan min rawn zem chiai chiai a, reilote ah tui takin ka muhil ta a.

Ka biangah chuan kut nel thep hian min rawn khawih a, min rawn sawi nghal a. Ka harh a, ka han men chuan nula khan min lo kai tho a lo ni a. Saptawngin, “Khawi nge kan thlen tawh i hria em?” tiin min zawt a. Tukverh ah chuan ka dak a, ka han hawi vel a. “Ka hre bik hauh lo mai. I muhil ve nange?” ka ti a. “Ka muhil ngamlo. Eng mi nge i nih pawh ka hre si lo,” a ti a.

In hmachhawnin kan thu a. Eng eng emaw ka zawt a, tha takin min chhang ta zel a. A chanchin ka zawt ta a, ka tisual ta em ni ka ti hman a, a hmel chu a rawn dur deuh khap a, tukverh lam chu a en a. Thaw la te te a, “ Ka nu leh pa hian Silcharah sorkar hna an thawk ve ve a, ka pa hi Manipuri a ni a, ka nu chu Bengali a ni. Bengali mi hausa fapa pasalah min neihtir an tum a, ka duh si lova, an thu anga ka awmloh chuan ka hmabak chu a thim hle dawn tih ka hria a. Mahse, ka pasal tura an tih chu ka duh lo mai pawh a ni lo, a hmel ka hmuh ringawt pawhin ka ten a ni. Chuvang chuan tlanbo mai ka duh ta a. Ka nu nen Bazarah kan kal a, a hriat lohvin ka pen san ta a, tichuan Rel ah ka rawn chuang a. Ka rel chuanna chu station pakhatah a ding ta a, a ding rei dawn tih min hrilh a, chutih lai tak chuan in chuanna hi a kal tan dawn chiah tih ka rawn hmu a, ka rawn lut ta tawp mai a ni. Ka u hi Gauhati ah nupui fanau neiin a awm a. A hnen ka pan mai ang ka ti a ni,” a ti a.

A hmel chu ka lo en chiang lo va, ka han en chiang a, a hnar leh mitmengah chuan Bengali thisen kai a nihna a lang a, a mitko vel leh a biang velah erawh chuan Manipuri hmel a lang thung a. Manipuri leh Bengali thisen inpawlh, duhthusama hmeltha leh piannalha siam nula hi a ni ringawt maiin ka hria a. A hnar chu mawi tawk chauhvin a zum a, a ka reh te chu...ka sawi thiam lo. A sam chu a dum a, a dar thleng vel a ni a. A mitmeng chu a mawi mai pawh niin ka hre lo, min hipna engemaw tak hi a awm tel a. A hming ah chuan Singh tih a telin ka hria a, ka chhin chhiah mai thei ta lo.

Ka chanchin min zawt a. Mizo ka nih thu te,Diphu ah ka ni te tlawh tura kal ka nih thute ka hrilh a. Khawdang hawi miah lovin min en a, ka sawi zawh chuan tukverh lam a en a, a ngawi ta daih a. Nakinah chuan, “Ka ril a tam,” a rawn ti phawng mai a. Ka nuin chhangban, changel hnah ngeia fun min pai tir chu ka hre chhuak zawk a. Ka bag atangin ka phawrh a. Chhang ban chu Mizo in kan chhang ngaihhlut ber pawl a nihzia te, an siamdan te chu ka hrilh a. Flask a ka thingpui pai nen chuan tui ti takin kan ei dun a. A chhangban ei lai te chu ka tan hmuhnawm a tling. TV ah chhangban faknan hmang ta ila ti tein ka lo ngaihtuah a, a thial dan te chu a mawi bik riau hian ka hria a. A mitmeng leh hmelah chuan min hlau tawh lova, ka bulah chuan a thla a muang tawh a ni tih ka hre thei a.

“ I hming hi Daltoni nise i inhmeh ngawt ang,” kan ti tawl a. A nui sen sen a. “Chutiang chuan min ko rawh, pawi ka ti lo, a mawi ka ti. Ka pa hi India filmstar Neetu Singh atchilh tlatttu a ni a, chuvang chuan ka hmingah Neetu Singh tih a phuah a, mahse chu ai chuan ka hming atana i sawi chu mawi ka ti zawk,” a lo ti a. Ka hming min zawt a, “Lalnghahmawia ka ni, Mawia tiin min ko mai rawh,” ka ti a. A nui rah rah a. “Ka lehkhabu ka chhiara a changtupa Sigfret-a hmel leh pianzia nen in in an hmel ka ti. Chuvangin Sigfreta ni mai rawh,” min ti a. Keipawh chuan, “Kei pawh ka lehkhabu chhiara a changtunu Daltoni kha i nih hmel riauvin ka hria a,” ka ti a. Kan pahnih chuan kan nui dun a, hming kan inphuahsak tawn chu a ni ta der a.

“He Rel hian Diphu a thleng phawt ang a, chumi hnuah let lehin Lumding a pan phei leh phawt ang a, Lumding atang chuan Gauhati lam a pan dawn a nih hmel. Hei, kan chuanna lah hi sipaiho chuanna tur bik a ni nge, tumah dang lah an rawn lut lova, min rawn check tu lah chu an awm miah lo mai a, a mak khawp mai,” ka ti a. Ani chuan, “Pathianin ka tawngtaina a chhang a nih hi,” a ti a. “Eng sakhaw zuitu nge i nih?” ka ti a. Ani chuan, “Ka Pathian chu Lal Isua a ni,” a ti a. “Keipawh,” ka lo ti thuai a.

Thuthlengah chuan a bawk zal a, ka bag chu ka lukham tir a, reilo te ah a muhil ta siai siai a. Chu nula pian nalh leh hmeltha zet mai chuan ka mit a la a, tukverh lam nen chuan ka en tawn chhen a. Cinema pawh ka lo en tam ve tawh hle a, hetiang ang reng renga hmeichhe hmeltha hi ka la hmu ngai lo. B.Sc zirlai, fanu neih chhun leh nghal....a nu leh pa chu ka dem a, fa te duhlo chung chung pasal nei tura an tilui chuan min ti thinur a. Daltoni chu ka khawngaih a ni. Thuamhnaw hak thlak takngial pawh keng lovin ti hian a tlanbo a ni a, amaha Gauhati lam a pan turte chu ka ngaihtuah a, a u hnen chu ka hruai thleng phawt ang a, chuta tang chuan Diphu ah chuan ka let leh mai dawn em niang aw tiin ka ngaihtuah a.

No comments:

Post a Comment